Albin Kurti është kryetari i subjektit më të madh politik në vend, Lëvizja VETËVENDOSJE!, si dhe kryeministri i katërt dhe i gjashtë i Republikës së Kosovës pas shpalljes së pavarësisë. Ai ka lindur më 24 mars 1975 në Prishtinë. Albin Kurti iu bashkua Kryesisë së Unionit të Pavarur të Studentëve të Universitetit të Prishtinës në gusht 1997, i cili organizoi protesta paqësore, jo të dhunshme, për lirimin e ndërtesave dhe ambienteve të universitetit, të cilat u pushtuan nga autoritetet e regjimit serb. Kur filloi lufta në Kosovë, në gusht 1998, Kurti filloi të punojë si Sekretar i Zyrës së Përfaqësuesit të Përgjithshëm Politik të Ushtrisë Çlirimtare të Kosovës (UÇK), Adem Demaçi. Kur filluan bombardimet e NATO-s në Serbi dhe Kosovë në mars të vitit 1999, Kurti qëndroi në Prishtinë, dhe, u arrestua nga policia serbe më 27 prill 1999. Kur forcat serbe u tërhoqën nga Kosova më 10 qershor, Kurti dhe mbi dy mijë shqiptarë të tjerë u transferuan në burgjet serbe. Për shkak të presionit ndërkombëtar, Kurti u lirua më 7 dhjetor 2001. Më 23 prill 2003, Albin Kurti diplomoi në Fakultetin e Elektroteknikës në Universitetin e Prishtinës, drejtimi i Telekomunikacionit me Kompjuterikë. Në qershor 2005, Albin Kurti me aktivistë të tjerë të Rrjetit të Aksionit për Kosovën (Kosova Action Network) e avancuan atë në subjektin Lëvizja VETËVENDOSJE!. Ai ishte Kryetar i Lëvizjes VETËVENDOSJE! deri në mars të vitit 2015. Ai garoi përsëri në zgjedhjet e brendshme për Kryetar të Lëvizjes VETËVENDOSJE! në janar të vitit 2018 dhe i fitoi ato. Në periudhën 2005-2017, Kurti kaloi rreth një vit e gjysmë si i arrestuar nga pushtetet e UNMIK-ut, EULEX-it dhe Republikës së Kosovës. Albin Kurti ka qenë deputet i Lëvizjes VETËVENDOSJE! në Kuvendin e Republikës së Kosovës për tre mandate me radhë. Ai gjithashtu ka shërbyer si Kryetar i Komisionit për Punë të Jashtme në Kuvendin e Republikës së Kosovës në vitet 2011-2014. Në tri palë zgjedhjet e njëpasnjëshme parlamentare në Kosovë, më 2017, 2019 dhe 2021, Kurti ka qenë kandidati i partisë për kryeministër. Në zgjedhjet parlamentare të vitit 2017 dhe 2019, Kurti dhe partia e tij fitoi numrin më të madh të votave. Në zgjedhjet e mbajtura më 14 shkurt 2021, lista e VETËVENDOSJE! fitoi 50.28 për qind të votës popullore, e që është rezultati më i mirë që një parti e ka arritur që nga përfundimi i luftës në Kosovë. Ishte kandidati që fitoi numrin më të madh të votave në vend. Ndërsa në zgjedhjet e parakohshme parlamentare të mbajtura më 6 tetor 2019, Albin Kurti dhe Lëvizja VETËVENDOSJE! fitoi numrin më të madh të votave. Albin Kurti ka publikuar mbi 550 artikuj, dhe është ftuar të prezantojë në universitete të ndryshme të njohura brenda dhe jashtë vendit. Ai flet rrjedhshëm gjuhën shqipe, angleze dhe serbo-kroate.

Mimoza Kusari-Lila është deputete në Kuvendin e Republikës së Kosovës, Kryetare e grupit parlamentar të LVV dhe anëtare e Komisionit për Ekonomi, Industri, Ndërmarrësi dhe Tregti. Kusari Lila është po ashtu kryetare e Partisë Alternativa dhe ajo ka shërbyer si Zëvendëskryeministre e Republikës së Kosovës dhe Ministre e Tregtisë dhe Industrisë nga viti 2011-2013. Ajo ka qenë Kryetare e Komunës së Gjakovës nga nëntori i vitit 2013 deri në vitin 2017, e cila ishte e para dhe e vetmja grua kryetare komune në Kosovë. Mimoza Kusari-Lila hyri në politikë vitin 2003 kur mori pozitën e zëdhënëses dhe këshilltares politike të kryeministrit të atëhershëm të Kosovës, Bajram Rexhepi. Ajo ishte zëdhënëse e qeverisë së Kosovës për më shumë se një vit. Ajo u bë gruaja e parë që mori detyrën e kryetares së një komune në historinë e Kosovës. Kusari-Lila ka përfunduar studimet e nivelit master në Universitetin Duqense, në Pitsburg të Pensilvanisë. Kusari-Lila ka studiuar përmes bursës “Ron Brown Scholarship Program”.

Abelard Tahiri është deputet në Kuvendin e Kosovës nga radhët e Partisë Demokratike të Kosovës (PDK) dhe shef i Grupit të Grupit Parlamentar të PDK-së. Ai është gjithashtu anëtar i Komisionit për Ekonomi, Industri, Ndërmarrësi dhe Tregti. për Çështjet e Sigurisë dhe Mbrojtjes. Më parë ka qenë Ministër i Drejtësisë të Republikës së Kosovës. Nga viti 2008-2014 ka shërbyer si shef i kabinetit të Kryeministrit të Kosovës. Prej vitit 2014 deri në vitin 2016 ka qenë Këshilltar i Lartë Politik i Zëvendëskryeministrit. Ai ka shërbyer edhe si këshilltar i lartë politik i Presidentit të Republikës së Kosovës. z. Tahiri ka diplomuar në Fakultetin e Shkencave Politike dhe Administratës Publike në Universitetin e Prishtinës.

Arben Gashi është deputet i Kuvendit të Kosovës nga Lidhja Demokratike e Kosovës (LDK) dhe shef i grupit parlamentar të LDK-së. Ai është gjithashtu anëtar i Komisionit për Agjencinë Kosovare të Inteligjencës. Më herët, ka shërbyer si këshilltar politik i kryetarit të Prishtinës nga viti 2007 deri në vitin 2011. Nga viti 2010 deri në vitin 2014, ka qenë kryetar i Komisionit për Legjislacion, ndërsa nga viti 2014 deri në vitin 2017 ka qenë anëtar i Komisionit për Integrime Evropiane. Gashi ka përfunduar studimet Bachelor në Drejtësi në Universitetin e Tiranës dhe ka marrë titullin Master në Qeverisje në Universitetin e Trentos, Itali.

Besnik Tahiri është deputet i Kuvendit të Kosovës dhe zv. Kryetar i AAK-së. Ai është shef i grupit parlamentar të AAK-së në opozitë. Z. Tahiri përfaqëson Kosovën në Asamblenë Parlamentare të Këshillit të Evropës (PACE) në Strasburg. Në Asamblenë Parlamentare të Këshillit të Evropës (PACE), ai është anëtar i Komisionit për barazi dhe mosdiskriminim. Për dy vite me radhë, më 2022 dhe 2023, z. Tahiri është ranguar si deputeti më aktiv i Kuvendit të Republikës së Kosovës. Ky atribut buron nga një “think-tank” i njohur, siç është Instituti i Kosovës për Drejtësi (IKD), i cili monitoron Kuvendin e Kosovës. Në shtator të vitit 2022, ai është nominuar nga Ambasada e SHBA-së në Kosovë për të marrë pjesë në Programin e Lidershipit për Vizitorë Ndërkombëtar (IVLP): Raportet e degëve ekzekutive dhe legjislative për të avancuar sigurinë nacionale”, program i cili mbahet nga Departamenti Amerikan i Shtetit/ Ambasada e Kosovës. Programi është mbajtur nga data 18 deri me 29 shtator 2022. Gjatë vitit 2020, Z. Tahiri ka ushtruar pozitën e zv. Kryeministrit të parë si dhe për një kohë edhe të Ministrit të Punëve të Jashtme. Z. Tahiri ka shërbyer si koordinator nacional për reformat shtetërore në qeverinë e vitit 2018-2019 në Kosovë, duke udhëhequr dhe drejtuar procesin e reformave shtetërore, përfshirë pakon ligjore të reformave të administratës publike; ligjit mbi qeverinë; koordinimit me komuna; dhe bashkëpunimit me organizata lokale dhe ndërkombëtare, si dhe partnerë të përfshirë në proceset e reformave shtetërore. Nga viti 2009 deri më 2018, Z. Tahiri ka pasur një përvojë të gjatë ndërkombëtare si Konsulent Senior në organizata ndërkombëtare si UNDP, NDI, SDC, Chemonics dhe Tetra Tech. Ai ka punuar në Jordani për programe të udhëhequra nga SHBA-ja, programe të ndërlidhura me Sirinë si dhe me Ballkanin Perendimor. Nga dhjetori i vitit 2004 deri me 2008, ai ka shërbyer si këshilltar politik gjatë mandateve të tre Kryeministrave të ndryshëm të Kosovës. Nga viti 2008 ka ushtruar funksionin e Drejtorit Ekzekutiv të Institutit të Kosovës për Qeverisje Lokale (KLGI), një “think-tank” profesional në qeverisje lokale dhe decentralizim. Z. Tahiri është bursist i Chevening dhe ka qenë Presidenti i parë i Chevening Alumni Kosova. Ai është autor i disa artikujve hulumtues mbi decentralizimin dhe administrimin e qeverisjes lokale. Ai është ligjërues në Kolegjin UBT në Prishtinë. Z. Tahiri mban një MSc në Qeverisje të decentralizuar dhe Zhvillim Ndërkombëtar nga Universiteti i Birminghamit në Mbretëri të Bashkuar, si dhe diplomë nga Programi Akademik Edukativ nga OSBE. Ai është Vlerësues Ndërkombëtar i certifikuar nga Asosacioni Ndërkombëtar për Vlerësim të Zhvillimit (IDEAS), Universiteti Carlton, Ottawa, Kanada.

Dr. Enis Kervan është deputet në Kuvendin e Kosovës nga Partia Demokratike Turke e Kosovës (PDTK). Ai është Kryetar i Grupit Parlamentar Multietnik në Kuvendin e Kosovës dhe anëtar i delegacionit të Kosovës në Asamblenë Parlamentare të Këshillit të Evropës. Më parë ka shërbyer si Ministër i Zhvillimit Rajonal dhe Zëvendësministër i Arsimit. Dr. Kervan ka mbajtur pozita të tilla si Nënkryetar i Kuvendit dhe Nënkryetar i disa komisioneve. Në fushën akademike, ai ligjëron gjuhën dhe letërsinë turke në Universitetin e Prizrenit “Ukshin Hoti.” Ai ka doktoraturë në Shkencat Filologjike nga Universiteti “Shën Kirili dhe Metodi.” Flet rrjedhshëm turqisht, shqip, serbisht dhe anglisht. I lindur në Prizren në vitin 1979, është i martuar dhe ka tre fëmijë.

Fitore Rexhepi është redaktore e Radio Televizionit të Kosovës. Ajo është gazetare me përvojë dhe moderatore me sfond në marrëdhëniet dhe ligjin ndërkombëtar. Ajo ka diplomë master nga Fakulteti Juridik në Marrëdhëniet Ndërkombëtare, gjë që shpërfaq përkushtimin e saj për të kuptuarit e çështjeve komplekse globale. Karriera e Fitores në gazetari nisi më 2004 në RTK, ku ka qenë figurë kyçe në debatet politike, duke kontribuar në mënyrë domethënëse në përmbajtjen editoriale dhe moderimin në RTK Prime. Ekspertiza dhe përkushtimi i saj për gazetarinë e kanë bërë zë të respektueshëm në peisazhin mediatik, e njohur për analizat e saj të thella dhe diskutimet mendjemprehta. Puna e Fitores mishëron të kuptuarit e thellë të dinamikave politike, duke e bërë aset të vlefshëm për RTK-në dhe burim të besueshëm informacioni për shikuesit.

Vlora Çitaku është Sekretare e Përgjithshme e Partisë Demokratike të Kosovës. Më parë ka shërbyer si nënkryetare e Partisë Demokratike të Kosovës (PDK). Gjithashtu, ajo ka shërbyer si ambasadore e Kosovës në Shtetet e Bashkuara të Amerikës. Më parë ka shërbyer si Konsulle e Përgjithshme e Kosovës në Nju Jork. Para se t'i bashkohej trupit diplomatik të Kosovës, Vlora shërbeu si Ministre për Integrime Evropiane të Kosovës. Ajo u shqua si një nga ministret më të suksesshme të qeverisë së Kosovës 2011-2014. Ajo hoqi dorë nga pozita e deputetetes me marrjen e postit qeveritar, të cilin e fitoi si një nga tre kandidatët më të votuar. Vlora Çitaku ishte vetëm adoleshente kur u bë përkthyese për mediat kryesore perëndimore, në fillimin e luftës në Kosovë. Refugjate gjatë Luftës së Kosovës, ajo është marrë me politikë që nga viti 1999. Fillimisht u bë zëdhënëse e UÇK-së dhe iu bashkua PDK-së pas formimit të partisë në Kosovën e pasluftës. Ajo ka qenë deputete në dy mandate. Ka theksuar se i ka kapërcyer stereotipet në politikë se duhet të jesh i moshuar dhe burrë. Ka qenë Ushtruese e Detyrës së Ministres së Punëve të Jashtme nga 18 tetori 2010 deri më 22 shkurt 2011.

Alexander Chavarria është ish-Drejtor Senior Rezident i NDI në Kosovë. Në të kaluarën ai ka shërbyer si Drejtor Senior Rezident në NDI Liberia, dhe si Drejtor për pjesëmarrje qytetare në Asamblenë Legjislative të El Salvadorit. Ai ka shërbyer edhe si konsulent ndërkombëtar në cështjet që kanë të bëjnë me demokracinë dhe qeverisjen për IADB-në, Programin e Buxhetit Ndërkombëtar, Grupin Parlamentarët për Habitat dhe OAS-në. Z. Chavarria ka bashkëthemeluar, asistuar dhe më vonë edhe ka shërbyer edhe si këshilltar për Programin e Zhvillimit Legjislativ (PRODEL) për Asamblenë Legjislative të Kosta Rikës. Ai po ashtu ka qenë i angazhuar si konsulent ndërkombëtar në programe të modernizimit legjislativ në Guatemala si dhe si këshilltar legjislativ në Dhomën e Përfaqësuesve në Legjislaturën e Teksasit. Z. Chavarria po ashtu ka qenë vëzhgues ndërkombëtar për OAS-në përgjatë zgjedhjeve presidenciale të 2004-tës në El Salvador. I lindur në Kosta Rikë, Z. Chavarria është magjistër në administrim biznesi nga Pontificia Universidad Católica de Chile, si dhe magjistër i Shkencës Politike nga Texas State University, dhe po ashtu është edhe i diplomuar i programit “licenciatura” nga Universiteti i Kosta Rikës, Shkolla e Shkencës Politike.